學做父母

學做父母, 係一輩子既事。無人一出世就識做人父母, 學校無教, 父母唔教(最多做咗個榜樣你睇, 榜樣係好定壞, 都係要自己學習去分辨), 無啦啦一個人點會識做父母呢?

所以我好主張為人父母, 要終生學習。小朋友每一個成長階段, 亦同時係父母學習既階段。

由最基本學習點去照顧小朋友起居飲食, 到學習、教養、溝通、互相尊重、到小朋友大咗, 要學會點去包容, 學習將來時代不同而可能出現既代溝, 佢結婚生仔點樣去愛佢既另一半。呢d通通都係學問。

以前我唔識煮飯唔煲涼茶, 為咗個女, 要上網睇下有咩好既recipe, 咩食物有益, 希望家人身體健康之餘, 亦可以等將來個女大咗, 佢會當我係「寶」, 因為我覺得屋企有一個老人家識呢d傳統野, 真係好難得 (咁講法, 當然係因為我屋企無老人家識呢d野)。

我個女而家只係兩歲多dd, 後面仲有好多野學, 我只知道, 呢條係一條好長既路, 我要多d上堂睇書同人討論充實自己裝備自己, 時代不斷地變, 身為父母既我們要不斷與時並進。

咁啱寫呢篇文章時, 睇到陳敏兒響某雜誌既訪問, 原來, 佢正正成立咗一個非牟利機構, 叫家長滙習, 志在開辦課程教好家長, 因為佢覺得, 教好父母, 可以影響成頭家, 甚至整個社會。我非常讚同!!! 希望大家都可以將呢個慨念傳揚出去。